Nova Vulgata84 84,1Magistro chori. Secundum «Torcularia». Filiorum Core. Psalmus.
Nova Vulgata 84,2Quam dilecta tabernacula tua, Domine virtutum!
Nova Vulgata 84,3Concupiscit et deficit anima mea in atria Domini. Cor meum et caro mea exsultaverunt in Deum vivum.
Nova Vulgata 84,4Etenim passer invenit sibi domum, et turtur nidum sibi, ubi ponat pullos suos: altaria tua, Domine virtutum, rex meus et Deus meus.
Nova Vulgata 84,5Beati, qui habitant in domo tua: in perpetuum laudabunt te.
Nova Vulgata 84,6Beatus vir, cuius est auxilium abs te, ascensiones in corde suo disposuit.
Nova Vulgata 84,7Transeuntes per vallem sitientem in fontem ponent eam, etenim benedictionibus vestiet eam pluvia matutina.
Nova Vulgata 84,8Ibunt de virtute in virtutem, videbitur Deus deorum in Sion.
Nova Vulgata 84,9Domine, Deus virtutum, exaudi orationem meam; auribus percipe, Deus Iacob.
Nova Vulgata 84,10Protector noster aspice, Deus, et respice in faciem christi tui.
Nova Vulgata 84,11Quia melior est dies una in atriis tuis super milia, elegi ad limen esse in domo Dei mei magis quam habitare in tabernaculis peccatorum.
Nova Vulgata 84,12Quia sol et scutum est Dominus Deus, gratiam et gloriam dabit Dominus; non privabit bonis eos, qui ambulant in innocentia.
Nova Vulgata 84,13Domine virtutum, beatus homo, qui sperat in te.