Nova Vulgata - Vetus Testamentum - Esdrae - 10

Esdrae

10 ¹Dum ergo oraret Esdras et imploraret flens et prostratus ante templum Dei, collectus est ad eum de Israel coetus grandis nimis virorum et mulierum et puerorum; et flevit populus fletu multo. ²Et respondit Sechenias filius Iehiel de filiis Elam et dixit Esdrae: «Nos praevaricati sumus in Deum nostrum et duximus uxores alienigenas de populis terrae. Nunc autem spes est in Israel super hoc: ³percutiamus foedus cum Domino Deo nostro, ut proiciamus universas uxores et eos, qui de his nati sunt, iuxta voluntatem Domini et eorum, qui timent praeceptum Domini Dei nostri, et secundum legem fiat. ⁴Surge, tuum est decernere, nosque erimus tecum; confortare et fac».
⁵Surrexit ergo Esdras et fecit principes sacerdotum et Levitarum et omnem Israel iurare, ut facerent secundum verbum hoc, et iuraverunt. ⁶Et surrexit Esdras ante domum Dei et abiit ad cubiculum Iohanan filii Eliasib et pernoctavit ibi; panem non comedit et aquam non bibit, lugebat enim transgressionem eorum, qui venerant de captivitate.

⁷Et missa est vox in Iuda et in Ierusalem omnibus filiis transmigrationis, ut congregarentur in Ierusalem; ⁸et omnis, qui non venerit in tribus diebus iuxta consilium principum et seniorum, auferetur universa substantia eius, et ipse abicietur de coetu transmigrationis. ⁹Convenerunt igitur omnes viri Iudae et Beniamin in Ierusalem tribus diebus, ipse est mensis nonus vicesimo die mensis, et sedit omnis populus in platea domus Dei, trementes pro peccato et pluviis.

¹⁰Et surrexit Esdras sacerdos et dixit ad eos: «Vos transgressi estis et duxistis uxores alienigenas, ut adderetis super delictum Israel. ¹¹Et nunc date confessionem Domino, Deo patrum vestrorum, et facite placitum eius et separamini a populis terrae et ab uxoribus alienigenis».
¹²Et respondit universa multitudo dixitque voce magna: «Iuxta verbum tuum ad nos, sic fiat. ¹³Verumtamen quia populus multus est et tempus pluviae, et non sustinemus stare foris, et opus non est diei unius vel duorum — multi quippe peccavimus in sermone isto — ¹⁴constituantur principes in universa multitudine; et omnes in civitatibus nostris, qui duxerunt uxores alienigenas, veniant in temporibus statutis, et cum his seniores per civitatem et civitatem et iudices eius, donec avertatur ira Dei nostri a nobis super peccato hoc». ¹⁵Tantummodo Ionathan filius Asael et Iaasia filius Thecue steterunt contra hoc, et Mosollam et Sabethai Levites adiuverunt eos.

¹⁶Feceruntque sic filii transmigrationis. Et elegit Esdras sacerdos viros principes familiarum iuxta domus patrum eorum, omnes autem per nomina eorum, et sederunt in die primo mensis decimi, ut quaererent rem. ¹⁷Et absolverunt causam cunctorum, qui duxerant uxores alienigenas, intra diem primam mensis primi.
¹⁸Et inventi sunt de filiis sacerdotum, qui duxerant uxores alienigenas. De filiis Iesua filii Iosedec et de fratribus eius: Maasia et Eliezer et Iarib et Godolia; ¹⁹et dederunt manus suas, ut eicerent uxores suas et pro delicto suo arietem offerrent. ²⁰Et de filiis Emmer: Hanani et Zabadia. ²¹Et de filiis Harim: Maasia et Elia et Semeia et Iehiel et Ozias. ²²Et de filiis Phassur: Elioenai, Maasia, Ismael, Nathanael, Iozabad et Elasa.
²³Et de filiis Levitarum: Iozabad et Semei et Celaia, ipse est Celita, Phethahia, Iuda et Eliezer. ²⁴Et de cantoribus: Eliasib. Et de ianitoribus: Sellum et Telem et Uri. ²⁵Et ex Israel de filiis Pharos: Remia et Iezia et Melchia et Miamin et Eleazar et Melchia et Banaia. ²⁶Et de filiis Elam: Matthania, Zacharias et Iehiel et Abdi et Ierimoth et Elia. ²⁷Et de filiis Zethua: Elioenai, Eliasib, Matthania et Ierimoth et Zabad et Aziza. ²⁸Et de filiis Bebai: Iohanan, Hanania, Zabbai, Athalai. 29Et de filiis Beguai: Mosollam et Melluch et Adaia, Iasub et Saal et Ramoth. ³⁰Et de filiis Phahathmoab: Edna et Chalal, Banaias et Maasias, Matthanias, Beseleel, Bennui et Manasse. ³¹Et de filiis Harim: Eliezer, Iesia, Melchias, Semeias, Simeon, ³²Beniamin, Melluch, Samarias. ³³ Et de filiis Hasum: Matthanai, Matthatha, Zabad, Eliphalet, Iermai, Manasse, Semei. 34De filiis Bani: Maaddi, Amram et Ioel, ³⁵Banaia et Badaias, Cheliau, ³⁶Vania, Meremoth et Eliasib, ³⁷Matthanias, Matthanai et Iasi. 38Et de filiis Bennui: Semei ³⁹et Selemias et Nathan et Adaias ⁴⁰et Mechnedebai, Sisai, Sarai, ⁴¹Azareel et Selemias, Samaria, ⁴²Sellum, Amaria, Ioseph. ⁴³De filiis Nabo: Iehiel, Matthathias, Zabad, Zabina, Ieddu et Ioel et Banaia.
44Omnes hi acceperant uxores alienigenas et dimiserunt uxores et filios.